أيام قليلة وهنستقبل أجمل مناسبة في حياتنا.. عيد الأم. اليوم اللي بنستناه طول السنة، ونحوش له قبل ما ييجي بكام شهر. علشان نجيب هدية تليق بست الحبايب. وبما إن معظمنا قاعد في البيت اليومين دول، فقولنا نشارككم بأفكار بسيطة لهدايا عيد الأم من البيت. تعالوا نشوف:
- هدية أونلاين
ده طبعًا أول اقتراح بما إن الكل قاعد في البيت، والأماكن بتكون زحمة. دلوقتي أسواق كتير بتوصل الهدايا لحد باب البيت. شوف أكتر حاجة هي بتحبها أو محتاجاها، وبـ click واحدة هتكون عندك. والألطف بقى لو خليتها تستقبل الهدية بنفسها من الدليفري.
- ساعدها في شغل البيت
ممكن تريحها من كل شغل البيت في اليوم ده. بإنك تصحى من بدري تروق أي كراكيب في البيت، وياسلام لو حضرت الفطار وجيبته لها في السرير. مفيش مانع تجرب تحضير الغدا، لو ليك في الطبخ. في اليوم ده خليها ملكة بجد.
- اتفرج معاها على أفلام بتحبها
أكيد عارف مزاج والدتك في الأفلام عامل إزاي، وغالبًا هتلاقيها بتحب أفلام الأبيض والأسود. مهما كان الفيلم قديم ولا جديد، هتلاقيه موجود على مواقع الأفلام المشهورة. حضر الفشار اللذيذ وقضوا وقت رايق. ومتنساش توثق اليوم بصور.
- هدية هاند ميد
لو ليك في شغل الهاند ميد، ممكن تعملها هدية بنفسهك. زي سكارف مثلًا. وكده كده الإنترنت مليان أفكار وفيديوهات لطريقة عمل الهدايا الهاند ميد. فمش هتحتار، وهتتعلم تنفذها بنفسك.
- اشتراك في خدمات المشاهدة
ممكن بقى تزود لها جرعة المشاهدة، وتشترك لها في OSN أو شاهد، أو أي خدمة من خدمات التليفزيون المدفوع. هتلاقي عليه أفلام ومسلسلات أكتر، ده غير برامج الطبخ إياها.
- قسيمة شراء
تقدر تفاجأها بقسيمة شراء، وتخليها تشتري اللي هي عايزة براحتها. أسواق الأونلاين دلوقتي منتعشة جدًا، بما إن الناس مش بتخرج من البيوت. وممكن تلاقي خصومات كتير على حاجات بتحبها.
