إمبارح، خلال استقبال عزاء الراحلة سمية الألفي، وبحضور عائلتها وأصدقائها، وأبنائها أحمد وعمر الفيشاوي، تجمع عدد كبير جدًا من الأشخاص، يُقال إنهم تابعين لصفحات على السوشيال ميديا، مع مصورين من المواقع الإخبارية، لتصوير تفاصيل العزاء ولحظات تأثر المعزين!

في البداية، الأمر مر بسلام، ولكن بدأ عدد من المصورين الاقتراب بشكل مستفز وغير لائق بهيبة العزاء والموقف، فقام أحمد من على كرسيه وحاول تنظيمهم وقال لهم: "اتعاملوا مع العزاء على إنه ريد كاربت"، ومن الواضح إنه كان بيوجه لهم رسالة غير مباشرة بتقول إن ده عزاء مش ريد كاربت، بتتزاحموا علشان تصوروا إيه؟!

وبعد شوية، قرر شخص ما إنه يقف قدام أحمد الفيشاوي مباشرة على بعد مسافة قريبة جدًا، ويصوره! وهنا قام أحمد وأخذ منه موبايله، وحصلت مشادة بين الطرفين.

جمهور السوشيال ميديا انقسم، وحصل جدل كبير على تصرف أحمد، وناس قالت إنه غلطان، وناس تانية شافت إنه من حقه بعد الاستفزاز واقتحام خصوصيته بالشكل ده، خاصة إنه ما منعش حد من التصوير، ولكنه طلب منهم عدم الاقتراب والوقوف على مسافة معينة، لتسهيل دخول وخروج المعزين.

في النهاية، حابين نقول: لحد إمتى هنشوف المشاهد دي بتتكرر في كل عزاء أو جنازة؟ وليه بطلنا نحس بمسؤولية تجاه اللحظات الإنسانية الصعبة اللي بيمر بيها غيرنا؟!