أعلن المجلس الأعلى لتنظيم الإعلام عن حجب لعبة روبلوكس في مصر، وقال عصام الأمير، نائب رئيس المجلس، خلال جلسة في مجلس الشيوخ، إنه جاري تنسيق مع الجهاز القومي لتنظيم الاتصالات لتنفيذ قرار الحجب فعليًا.
وضح إن القرار بيرجع لخطورتها على الأطفال والمراهقين، خاصة إن روبلوكس مش مجرد لعبة واحدة، لكنها عالم افتراضي مفتوح بيخلي المستخدمين يقدروا يلعبوا ويتواصلوا مع ناس من كل أنحاء العالم، وده صعب جدًا يتراقب أو يتسيطر عليه بشكل كامل.
أهم المخاطر اللي اتكلم عنها القرار: وجود محتوى غير مناسب للأطفال داخل اللعبة، تواصل مباشر مع غرباء من غير رقابة كافية، صعوبة متابعة المحتوى من ناحية الرقابة، مخاطر نفسية وسلوكية زي الإدمان الرقمي، العزلة، وتراجع تحصيل الأطفال، مخاوف مالية بسبب أنظمة الشراء داخل اللعبة اللي بتعتمد على عملة افتراضية تُشترى بفلوس حقيقية.
إيه هي لعبة روبلوكس؟
روبلوكس واحدة من أكبر منصات الترفيه الإلكترونية في العالم، اتطلقت سنة 2006 وبيستخدمها حوالي 78 مليون شخص يوميًا، أغلبهم أطفال ومراهقين تحت 16 سنة.
اللعبة مش تجربة واحدة، لكنها منصة مفتوحة بتسمح للمستخدمين يعملوا عدد لا نهائي من الألعاب، وده بيخلي محتواها متغير وصعب يتراقب بالكامل، يعني بدل ما تلعب لعبة واحدة، بتدخل عالم افتراضي ضخم مليان ملايين الألعاب الصغيرة اللي صنعها لاعبين من كل أنحاء العالم.
ليه بتجذب الأطفال والمراهقين؟
الدكتور تامر شوقي أستاذ علم النفس التربوي أوضح إن روبلوكس جذابة جدًا للأطفال لأنها بتعتمد على عوامل نفسية وتقنية مع بعض؛ اللعبة مجانية وسهلة التشغيل على أي جهاز، وبتعتمد على اللعب الجماعياللي بيشبع إحساس الطفل بالانتماء، وفيها دردشة مباشرة وتعارف مع ناس من دول مختلفة، غير إنها بتشجّع الخيال والإبداع من خلال تصميم الألعاب، وبتستخدم مؤثرات بصرية وصوتية جذابة، وكمان نظام مكافآت وتعزيز إيجابي بيزوّد التعلّق باللعبة وبيوصل أحيانًا للإدمان.
الفلوس في روبلوكس؟
روبلوكس لعبة مجانية، لكن فيها نظام فلوس داخلي قائم على عملة إلكترونية اسمها Robux، واللي بتتشتري بفلوس حقيقية وبيستخدمها اللاعب في شراء لبس ومزايا وأدوات أو دخول ألعاب معينة.
كمان في اشتراك اختياري اسمه Roblox Premium، وده بيدي المستخدم Robux شهريًا ومزايا بيع وشراء داخل المنصة، والمشكلة إن الأطفال ممكن يتعاملوا مع العملة دي كنقاط لعب مش فلوس حقيقية، وده بيخلي الصرف يحصل بسهولة من غير إحساس.
