بعد ما انتشرت فيديوهات عزاء والد محمد رمضان، وظهوره هو وأخوه مبتسمين في بعض اللقطات، ناس كتير على السوشيال ميديا بدأت تسأل: إزاي ممكن حد يضحك في العزاء؟

علشان كده قولنا نبحث ونشوف جايز يكون في تفسير لده، وفعلًا لاقينا دراسات وأبحاث اتعلمت مخصوص في أكتر من جامعة عالمية على اللحظات دي.

وكشفت دارسة من جامعة كاليفورنيا، إن الضحك بعد الفقد بيساعد الشخص يخفف التوتر ويسترجع قدرته على التكيف.

لاقينا كمان إن في نظرية نفسية اسمها "المعالجة المزدوجة للحزن" بتوضح إن الإنسان بيكون متخبط بين الألم ومحاولة الرجوع للحياة، والضحك بيكون خطوة من خطوات التوازن دي.

الباحثين أكدوا كمان إن الضحك في المآتم ممكن يكون وسيلة للتقارب بين الناس وتخفيف ثقل اللحظة، لكن لازم يكون في حدود، لأن بعض الناس ممكن تحسه تصرف جارح أو مش لائق.

يعني ببساطة، الضحك في العزاء مش برود أو قلة احترام للموقف، لكنه غريزة دفاعية من العقل عشان يقدر يكمل.

الصورة من موقع: مبتدأ