وجهت الدكتورة نانا زويل، أخت العالم الراحل أحمد زويل الشكر لنقابة الموسيقيين، بعد وقف مغني المهرجانات أحمد خالد الشهير بـ "كزبرة" عن العمل وتحويله للتحقيق، عايزين تعرفوا إيه الحكاية بالظبط! تابعوا السطور الجاية..

ببساطة، طرح كزبرة فيديو كليب جديد اسمه "عليا الطلاق كله بيكدب"، وبعيدًا عن غرابة الاسم، لكن الأغرب إن الكليب تضمن صورة العالم الكبير أحمد زويل، طبعًا الأمر أزعج عائلته، وقررت أخته التواصل مع نقيب الموسيقيين، الفنان مصطفى كامل، وطلبت منه التدخل السريع، لإنهاء الوضع المريب ده.

بالفعل النقابة أصدرت بيان، وضحت خلاله إن وجود صورة أحمد زويل في عمل زي ده، يعتبر إهانة وإساءة لرموزنا العلمية، اللي بنتشرف بيهم على مستوى العالم، مش بس كده، قرر النقيب إيقاف ومنع "كزرة" عن العمل وتحويله للتحقيق يوم الأحد الجاي.

ونبه البيان على كل المطربين الشعبيين، بإن أي عضو هيغني أغنية بنفس اللفظ ده "عليا الطلاق"، هيتحول للتحقيق فورًا، وده بهدف المحافظة على قيمنا المجتمعية وإعلاء الذوق العام.