جمهور الفنان الكوميدي محمد هنيدي على موعد مع أحدث أفلامه "الإنس والنمس" الكوميدية، والمقرر طرحه في جميع دور العرض، يوم 4 أغسطس الجاي. وده بعد ما تم تأجيله أكتر من مرة أخرهم بسبب أزمة فيروس "كورونا" المستجد.

وفي مداخلة هاتفية مع الإعلامي شريف عامر، صرح "هنيدي" بإنه متوتر جدًا وقلقان الفترة دي، لكنه وصف القلق ده بإنه صحي وبعد تعب ومجهود كبير.

ووضح كمان إنه منتظر رد فعل الجمهور على الفيلم، وقال: "الجمهور هو اللي بنفضل نعمل حسابه طول ما أحنا شغالين، ولما بيدينا ثقته وحبه يبقى لازم نتعب في الشغل".

الفيلم أحداثه بتدور في إطار رعب كوميدي، بيجسد خلاله "هنيدي" شخصية موظف حكومي فقير، بيورث بيت رعب في الملاهي، وبيدخل في قصة حب بتواجهها مشاكل كتير، وبتتصاعد الأحداث الكوميدية.

بيشارك في بطولة الفيلم منة شلبي، بيومي فؤاد، عمر عبد الجليل، صابرين، سليمان عيد، شريف الدسوقي، دنيا ماهر، عارفة عبد الرسول، وبيقدم مغني المهرجانات "أوكا" مهرجان "هبل" خلال الأحداث، الفيلم من تأليف كريم حسن بشير، وإخراج شريف عرفة.