بدأ شهر ديسمبر وبدأت معاه تحضيرات الكريسماس، من إيفينتات وحفلات وغيره. لكن ده مش كل حاجة، الكريسماس جي ومعاه 8 أفلام جديدة. هتتنوع بين الكوميدي والرومانسي وكمان الرعب. تعالوا نتعرف على الأفلام اللي هتنافس على شباك التذاكر في رأس السنة:
1- بيت ست
هيكون في دور العرض يوم 11 ديسمبر. الفيلم خيالي بيحكي عن عودة "ست" ملك الشر عند الفراعنة، للحياة مرة تانية. بطولة ماركو حداد، رانيا الخطيب، مصطفى عبد السلام، مروان مسلم. تأليف شادى المسلمى وإخراج أحمد عادل عقل.
2- لص بغداد
مقرر عرضه في يناير 2020. وهو فيلم أكشن كوميدي، أبطاله بيدخلوا في مغامرة كوميدية وهما بيدوروا على كنز مفقود. بيشارك في بطولته: محمد إمام، فتحى عبدالوهاب، أمينة خليل، ياسمين رئيس. تأليف تامر إبراهيم، وإخراج أحمد خالد موسى. و
3- الفلوس
بعد التأجيلات وتغيير اسمه كذا مرة، فيلم "الفلوس" هيتعرض يوم 25 ديسمبر. الفيلم بيناقش أزمة الثقة بين الناس، اللي بتسبب مواقف صعبة كتير. بطولة تامر حسني، زينة، خالد الصاوي. تأليف محمد عبد المعطى، وإخراج سعيد الماروق.
4- ديدو
هيتم عرضه في 31 ديسمبر الجاري. وبتدور أحداثه عن قصة عقلة الأصبع. بطولة كريم فهمي، حمدي الميرغني، أحمد فتحي، محمد ثروت، بيومى فؤاد. تأليف الفنان كريم فهمي وإخراج عمرو صلاح.
تم تأجيل عرض الفيلم لعيد الفطر.
5- بنات ثانوي
مقرر عرضه في أجازة نص السنة. بيدور عن 5 بنات في ثانوية عامة، واللي بيحصلهم في فترة المراهقة، ورحلة البحث عن الذات. بيشارك في بطولته هنادي مهنى، جميلة عوض، مى الغيطى، هدى المفتي، ميدو عادل، كريم قاسم. تأليف أيمن سلامة، وإخراج محمود كامل.
6- دماغ شيطان
هيتعرض يوم 25 ديسمبر الجاري، حسب ما حددت الشركة المنتجة. بيناقش عدد من القضايا الاجتماعية، خاصة ظروف المعيشة الصعبة اللي بيعاني منها كتير. بطولة باسم سمرة، رانيا يوسف، عمرو عابد، سلوى خطاب. تأليف عمرو الدالي، وإخراج كريم إسماعيل.
7- ريما
صناع الفيلم استقروا على عرضه في نص ديسمبر. أحداثه بتدور عن طفلة اسمها "ريما"، ورثت قدرات خارقة عن والدها. بتضطرها الظروف تهرب من أهلها، وتستقر عند رجل أعمال وزوجته مابيخلفوش. وبتساعدهم في أزمات كتيرة. بطولة مايا نصرى، ومحمد ثروت، هالة فاخر. تأليف أحمد أنور، وإخراج معتز حسام.
8- رأس السنة
بعد عرضه في ختام مهرجان "مراكش" المغربي، فيلم "رأس السنة" هيتعرض يوم 25 ديسمبر. بيدور عن عدد من المواقف الغريبة، اللي بتحصل لأبطاله يوم رأس السنة. بطولة إياد نصار، إنجى المقدم، أحمد مالك، بسمة، شيرين رضا، هدى المفتي. تأليف محمد حفظى، وإخراج صقر.
