من وقت للتاني، بيطرح المطربين أغاني مثيرة للجدل في كلماتها، كنوع من الاختلاف في سوق الأغاني، منها اللي بيكون شتيمة أو دعوة على "الإكس" الظالم. والحقيقة إن الأغاني دي بتسيب علامة والجمهور بيتفاعل معاها جدًا، يمكن لأنها من قلب الواقع وكلماتها بنسمعها في الشارع. إحنا جمعنا لكم 5 أغاني كلماتها مش عادية خالص، يالا نعرفها:
"أمك وأبوك" - روبي
الأغنية دي عملت جدل كبير على السوشيال ميديا قبل نزولها، والكل كان فاكر روبي هتشتم حبيبها على لسان بنات كتير، لإننا اتعودنا منها على الجرأة في أغانيها وكليباتها، وفي الأخر فكرة الأغنية طلعت بعيدة خالص، بعد ما قالت روبي: "ما تحبش حد قد أمك وأبوك.. أمك وأبوك".
"ملعون أبو الناس العزاز" – نوال الزغبي
من أكثر تترات المسلسلات اللي نجحت في الكام سنة الأخيرة، يمكن كمان وصلت فكرة المسلسل بشكل كبير، ورغم إن كلماتها قوية شويتين، بس عبرت عن إحساس المصدومين في أقرب الناس ليهم.
"أبو الرجالة" – شيرين
هنا شيرين بتوجه رسالة فيها لمحة سخرية كده لحبيبها، وده بعد ما ضحك عليها بكلمتين، الأغنية كلمات أيمن بهجت قمر، وألحان خالد عز.
"كبرتك على سيدك"- أصالة
زي ما بيقولوا "النهايات أخلاق"، بعد انتهاء العلاقة بين أي اتنين، بيان أصل كل حد فيهم، وهنا معانا نوع من الرجالة منقدرش ننكر إنه موجود، اللي هو بينكر فضل "الإكس" بتاعته عليه بعد وقوفها جنبه.
"أشوف فيك يوم"- عبد الفتاح الجريني
دعوة صريحة طالعة من القلب على الطرف التاني، ودي مرحلة بعض الناس بتتمناها تحصل قدام عنيهم، علشان تبرد نار قلوبهم شوية.
