انتهت فعاليات مهرجان الجونة للأفلام من كام يوم، وطبعًا ده كان بحضور عدد كبير من النجوم الفنانين. ومن أكتر الحاجات اللي ميزت ختام المهرجان، كانت أغنية "سقفة" لأحمد الروبي. وبصراحة الأغنية كانت فعلًا حلوة. فتعالوا نشوف إيه اللي ميزها عن الأغنيتين اللي فاتوا:
1- كاتشي وبتلزق في الدماغ
كلمات الأغنية كفاية تسمعها مرة واحدة، وهتلاقي نفسك ماشي بتدندنها. واللحن بتاعها بسيط وممتع، يخليك تتنطط وترقص. بس ده لا ينفي تمامًا جمال أغنية (3 دقات).
2- كلمة الزعيم
الأغنية بدأت بكلمة النجم عادل إمام من الدورة الثانية للمهرجان، دي طبعًا حاجة مميزة. ده الزعيم.
3- ريا أبي راشد
ريا ظهرت في الكليب يا جماعة. طب نقول إيه تاني. إحنا نشكر إدارة المهرجان إنها عوضت غياب رايا عن تقديم المهرجان، بظهورها في الكليب ده. حقيقي جميلكم فوق راسنا.
4- مش كلمات تامر حبيب
على رأي أكرم حسني في حفلة الافتتاح لما قال "كان لازم يظهر جيل يقضي على فكرة كتابة تامر حبيب لأغاني المهرجان". ده في حد ذاته اختلاف. الأغنية من كلمات أحمد الروبي ورامز يوسف.
5- نجوم ومشاهير بيظهروا لأول مرة
الكليب ده بيتميز بظهور نجوم ومشاهير كتير لأول مرة. على سبيل المثال شوفنا الأخوات شيحة مع بعض (حلا وهنا وهلا) – إلهام شاهين وليلى علوي – نجيب وسميح ساويرس اللي برضو أول مرة يظهروا في أغنية المهرجان. وغيرهم كتير.
6- الكل ظهر في الكليب
كليبات أول وتاني دورة من المهرجان كان لهم أبطال، وكانوا مركز على نجوم معينة أغلب الوقت. إنما الكليب ده ماخصصش حد معين. وظهر تقريبًا كل اللي شاركوا في المهرجان. سواء النجوم الكبار، أو الفنانين الصغيرين، وكمان الناس اللي بيكون شغلها ورا الكاميرا. ودي حاجة تحسب لكليب السنة دي.
7- خالد الصاوي
تقريبًا خالد الصاوي بقى تريند الفترة دي، بسبب الفيديوهات الكوميدية اللي بينشرها طول الوقت. وفي الكليب ظهر بيصقف بطريقة كوميدية برضو. لفتت نظر كل اللي اتفرج على الأغنية.
لو شوفتوا الكليب أو سمعتوا الأغنية بس، قولولنا رأيكم فيها في الكومنتات.
