طبعًا الماسك دلوقتي بقى شيء ضروري في حياتنا اليومية. لابسينه طول الوقت علشان نحمي نفسنا من فيروس كورونا. بس هل ضروري نلبس الماسك لو إحنا مش تعبانين؟ هل إحنا بنستخدمه صح وإحنا لابسينه؟

الموقع الرسمي لمنظمة الصحة العالمية (WHO)، وضح الأساليب الصحيحة لاستخدام الماسك الطبي. علشان نقدر نحمي نفسنا صح من كورونا:

إمتى نستخدمه؟

- لو انت سليم فانت مش محتاج تلبس الماسك. غير لو مسؤول عن رعاية حد مصاب.

- لو عندك كحة أو بتعطس.

- لازم لما تلبس الماسك تغسل إيد باستمرار بالمياه والصابون، أو تعقمها بمطهر. غير كده الماسك مش بيكون فعال.

- لازم تكون عارف إزاي تستخدمه وتتخلص منه بشكل صحيح.

إزاي نستخدمه؟

- لازم قبل ما تلبس الماسك، تعقم إيدك بمطهر أو تغسلها كويس بالمياه والصابون.

- غطي الأنف والفم كويس بالماسك. واظغط على الجزء المعدني عند الأنف، علشان ياخد شكلها. واتأكد إن مفيش أي فراغ بين وشك والماسك.

- اتجنب لمس الوش تمامًا وانت لابس الماسك. ولو حصل لازم تعقم إيدك بمطهر أو تغسلها كويس بالمياه والصابون.

- اتخلص من الماسك بمجرد ما تحس إنه بقى رطب. وبلاش تعيد استخدام الماسكات المعمولة لاستخدام مرة واحدة.

- لما تيجي تشيل الماسك، ابدأ من الجهة الخلفية عند الأذن. بلاش تمسكه من قدام. واتخلص منه فورًا في سلة مهملات تكون مقفولة. واغسل إيدك فورًا بالمياه والصابون.

ضروري ناخد بالنا من النصايح دي، علشان استخدام الماسك يكون فعّال بأقصى قدر.