المشروبات الغازية لها سحر لوحدها، وبالذات في الصيف، والموضوع بيوصل عند ناس كتيرة لدرجة الإدمان، والمنتشر عنها إنها بتسبب هشاشة عظام، لكن الحقيقة إن الإفراط في تناولها ممكن يسبب أمراض خطيرة أكتر. علشان كده لو أنت عطشان دلوقتي وبتفكر تشرب حاجة ساقعة، اقرأ السطور الجاية يمكن تغير رأيك وتطلب عصير فريش:
1- هتفتقد الفيتامينات والمعادن والألياف
دراسات كتير أثبتت إن مستوى استهلاك المشروبات الغازية، مرتبط بنوع الأكل الأطعمة والمشروبات الصحية اللي بنختارها على مدار اليوم، وده معناه إن الأشخاص اللي يشربوا صودا بشكل منتظم كل يوم، احتمال كبير يكون عندهم نقص في عدد من الفيتامينات والمعادن والألياف الغذائية.
2-أسنانك هتسوس وتتآكل
بتحتوي المشروبات الغازية على نسب عالية جدًا من السكر والحموضة العالية، الأمر اللي بيؤدي لـ تآكل المينا وتسوس الأسنان، حسب تقرير نشرته منظمة الصحة العالمية ومنظمة الأغذية والزراعة سنة 2003.
3-عظامك هتتكسر بسهولة
الكافيين الموجود في المشروبات الغازية له دور كبير في انخفاض كثافة معادن العظام وزيادة كسورها عند الأطفال والبالغين والنساء، ومع الوقت بتزيد احتمالية الإصابة بهشاشة العظام ونقص كالسيوم الدم.
4- هتزود فرص إصابتك بأمراض الضغط والقلب
تعرف إنك لو شربت أكتر من "كانزاية" في اليوم ممكن تصاب بأمراض مزمنة هتفضل تعاني منها عمرك كله، زي السمنة، ارتفاع ضغط الدم، ارتفاع كوليسترول الضار اللي بيسبب أزمات قلبية وتجلط الدم المفاجئ، بجانب زيادة محيط الخصر "الكرش"، والإصابة بمتلازمة التمثيل الغذائي، وضعف الجلوكوز خلال الصيام.
5- هتعاني من تقلبات مزاجية حادة
المشروبات الغازية من نوع الكولا بتحتوي على مادة الكافيين في حدود " 40-50" مجم لكل 375 ملي، ومع تناولها كل يوم بتعمل نوع من الإدمان المعتدل زي اللي بيحصل مع كثرة تناول الشاي والقهوة والشوكولاته، الأمر اللي ممكن يسبب ظهور حصوات الكلى، بالإضاقة لظهور أعراض الانسحاب منها الصداع والتعب وانخفاض اليقظة والاكتئاب والعصيبة.
6- جسمك هيكون معرض للإصابة بالسرطان
بتحتوي المشروبات الغازية على حمض البنزويك، بيتفاعل مع فيتامينات ومعادن وحديد موجود في الجسم، وبيكونوا في النهاية مادة كيميائية خطيرة بتزود إحتمالية خطر الإصابة بالسرطانات.
