مين فينا مابيحبش الحاجه الساقعة؟ المشروبات الغازية دايمًا لها مكان في القلب، ومكانها على السفرة ملوش بديل. الموضوع بيوصل عند ناس كتيرة للإدمان، ومايقدروش يستغنوا عنها سواء في الأكل أو أي وقت. وطبعًا الأمر مايخلاش من أضرار كبيرة، منها هشاشة العظام، زيادة الوزن، وظهور حب الشباب. علشان كده إحنا هنقول لكم على طرق تساعدكم تتخلصوا من إدمان المشروبات الغازية، حسب ما نشر "هن":
اشرب مياه كتير
بدل ما تشرب المياه الغازية لما تحس بالعطش، حاول تشرب كميات كبيرة من المياه. هتساعد على ترطيب جسمك، وتقلل حاجتك لشرب الصودا.
امضغ لبان
اللبان حل مناسب ممكن تلجأ له، لو حسيت برغبة في تناول المشروبات الغازية. ممكن كمان تقوم بأي نشاط مفيد زي إنك تتمشى كام دقيقة.
اتجنب الجوع
ضروري جدًا تتناول الوجبات اليومية بانتظام، بالإضافة لوجبات خفيفة صحية خلال اليوم، زي المكسرات والفواكه الطازجة. شعورك بالجوع هيقل وبالتالي رغبتك في المشروبات الغازية كمان هتقل.
تناول حلويات الصحية
فيه ناس بتشرب المشروبات الغازية علشان تديهم طاقة، لأن فيها سكريات. ممكن نلجأ للبدائل الصحية ومنها: العسل، اللبن، الفواكه الموسمية المليانة عناصر غذائية. وكلهم بيأدوا نفس الغرض.
واجه الضغط العصبي بالرياضة
البعض بيلجأ للمشروبات الغازية، كنوع من التنفيس عن الضغط العصبي. البديل الأفضل في الحالة دي هو ممارسة الرياضة والتأمل وتمارين التنفس. وفايدتتها هتكون أكبر.
اشرب مشروبات صحية
الشاي الأخضر - شاي الأعشاب - الفواكه - مياه جوز الهند - المياه المضاف لها نعناع وشرائح الخيار. كلها مشروبات صحية أفضل من الصودا، وبالتدريج إدمانك للمشروبات الغازية هيقل.
