ممكن تكون زهقت من أكل البيض كل يوم على السحور. لكنه في الحقيقية ضروري جدًا ومفيد، لأنه واحد من الأطعمة الغنية بالعناصر الغذائية الهامة للجسم. زي البروتين ومضادات الأكسدة، ونسبة عالية من الكالسيوم والحديد وفيتامين د. اللي نقصهم في الجسم بيسبب تعب وإرهاق شديد. فتعالوا نقول لكم على فوايد أكل البيض كل يوم:

1- بيقوي الجهاز المناعي

أكل بيضة أو اتنين كل يوم بيساعد على مكافحة العدى، ومفيد للنظام المناعي الصحي. كمان بينظم عمل هرمون الغدة الدرقية. وإحنا اليومين دول في أمس الحاجة لمناعة قوية.

2- بيقلل التوتر والقلق

بيحتوي على أحماض أمينية، بتنظم هرمون السيرتونين. المسئول عن الراحة والهدوء. وده هيحسن مزاجك في فترة الصيام.

3- بيعزز صحة العظام والأسنان

بيحتوي على فيتامين د، اللي بيساعد على تقوية العظام والأسنان. وضروري لعملية التمثيل الغذائي والهضم وصحة القلب.

4- بيحسن الوظائف الإدراكية

بيحتوي على فيتانمين ب، اللي بيحسن الوظايف الإدراكية والعصبية. فالتالي تقدر تركز في شغلك خلال النهار وانت صايم.

5- بيساعد على فقدان الوزن

البيض من الأطعمة اللي بتدي إحساس بالشبع لفترات طويلة، فمش هتحتاج تاكل كتير. خاصة إن رمضان أكتر وقت بيزيد فيه الوزن بسبب الأكل بكميات كبيرة. كمان البيض بيحتوي على سعرات حرارية منخفضة.