وصلنا للويك إند يا جماعة، والحقيقة إنه كان أسبوع مميز حبتين، مش بس علشان كنا متلجين فيه، لكن كمان علشان بعض الفنانين قالوا تصريحات صدمت عدد من جمهورهم، واتحولت لمادة خام للضحك أو للانتقاد أو للجدل. فتعالوا نفتكر كام تصريح للفنانين في اليومين اللي فاتوا:

حسن شاكوش والبصل الأخضر

حسن شاكوش وحمو بيكا، كانوا قاعدين في فندق بالرياض، شاكوش اتصل بموظفة في الفندق وطلب منها أكل مصري، فقال كده بالظبط: "عايز حزمة جرجير حي وبصل زي بتاع أمي.. الطويل دا اللي بناكله مع الفول، لو جبتيهم هغنيلك سكر محلي محطوط على كريمة".

يوسف الحسيني على الهواء مباشرة: "أنا مصاب بـ أوميكرون"

مش عارفين نعتبرها ذلة لسان ولا تلقائية ولا مجرد توقع مش في محله! المهم إن الإعلامي يوسف الحسيني، مقدم برنامج "التاسعة" على القناة الأولى، أعلن على الهواء مباشرة كده إصابته بأوميكرون، فقال "بدون قلق، غالبًا أنا مُصاب بأوميكرون، ولكن مش دي الأزمة، ولكن الأزمة أني مقدرتش أحضر عزاء الإعلامي وائل الإبراشي". هنسيب لكم التعليق.

والد ياسمين صبري بيحسبن عليها على الفيسبوك

ياسمين كل كلمة بتقولها لازم تقلب الدنيا، فبعد كلامها عن مرحلة طفولتها وشكل حياتها قبل ما تكون نجمة، اللي كان فيها شوية معاناة -حسب تعبيرها- والدها استُفز جدًا وطلع كتب بوست طويل عريض بينفي فيه كل اللي قالته، ودي كان رسالته ليها: "ياشيخة بطلي اللي أنتي فيه ده، وحسبي الله ونعم الوكيل فيكي..بطلي تجيبي سيرة عيلتك وأبوكي اللي رباكي منك لله". اعرفوا القصة الكاملة من هنا.

يحيي الفخراني ماكنش عايز يبوس هالة صدقي 

النجم الكبير يحيي الفخراني كان ضيف "صاحبة السعادة" هو وزوجته الدكتورة لميس جابر، وخلال دردشته مع الفنانة إسعاد يونس، رجع بالذاكرة لبداياته، لما كان بيصور فيلم "نص أرنب" مع المخرج محمد خان، واللي كان مصمم إنه يبوس الفنانة هالة صدقي بجد في أحد المشاهد، لدرجة إنه أعاد المشهد ده أكتر من مرة لإنه مبيعملش النوعية دي، بس كان بيقولها: "معلش أكل العيش مر". الكلام ده عرض "الفخراني" لهجوم كبير.

رانيا يوسف وشروط زوجها الجديد

خلال مقابلتها في برنامج "مصر جديدة"، اتكلمت رانيا بصراحتها المعروفة عن الزواج ومواصفات شريك حياتها في الفترة دي بحكم شغلها كممثلة، وكان فيه تصريحات عرضوها للسخرية على السوشيال ميديا: "الراجل اللي هيدخل حياتي لازم يقدر مواعيد شغلي لإني برجع البيت ساعات الساعة 5 الفجر، وممكن أقعد في الاستديو 3 أيام مرجعش البيت أصلاً".

هابي ويك إند يا جماعة.