أعلن الفنان أمير المصري اختيار فيلم "Limbo" اللي بيقوم ببطولته، رسميًا في الدورة 73 لمهرجان كان السينمائي الدولي. الفيلم بيدور عازف سوري بيسافر لندن علشان يطلب اللجوء السياسي. لما بيوصل هناك بيتم ترحيله لجزيرة مجهولة في اسكتلندا. وفيها مابيكونش عارف إيه مصيره.

تواصلنا مع أمير وعرفنا منه إن الفيلم تم تصويره في جزيرة "يويست" في اسكتلندا. وقال "الظروف هناك كانت صعبة جدًا، الرياح كانت قوية وبتوصل سرعتها لـ 60 ميل في الساعة. لكن ده كان مناسب جدًا لقصة الفيلم، والأحداث اللي بيدور فيها".

أمير صرح إنه هيحاول يخلي الفيلم يتعرض في مصر. وعن إحساسه بعد ترشيح الفيلم قال "أنا سعيد جدًا إن الناس هتشوف الفيلم. مهرجان "كان" ده حاجة كبيرة بالنسبالي، خصوصًا إن ده دور رئيسي في فيلم بريطاني. فأنا فخور إني بمثل مصر بأي طريقة ممكنة".

الفيلم إنتاج Film 4، BFI. وهيتم عرضه خلال فعاليات المهرجان في 2021، بعد إلغائها السنة دي بسبب كورونا. وفي نفس الدور هيتم عرض فيلم "سعاد" للمخرجة أيتن أمين.