انتشر خلال الساعات اللي فاتت تسجيل صوتي منسوب للفنانة شيرين عبد الوهاب، وخلق موجة كبيرة من الجدل بسبب الكلام الصريح اللي قالته عن الضغوط اللي بتمرّ بيها، وإنها بتتعرض لحاجات صعبة جدًا من ناس قريبين منها، ووصفت اللي بيحصل معاها بـ"تكسير وقتل".

في التسجيل، شيرين اتكلمت بوضوح عن موضوع اعتزال الغُنا اللي بيتكرر كل فترة، وقالت إنها مش ناوية تعتزل ولا تفكر أصلاً في ده، وإن الغناء  جزء من حياتها: "مافيش اعتزل، أنا هفضل أغنّي لحد آخر عمري".

الكلام ده جه ردًا على إشاعات بتطلع كل شوية عن ابتعادها عن الساحة أو رغبتها في الاعتزال، الجزء اللي شدّ الناس في التسجيل هو كلامها عن إنها بتتعرض لضغوط شديدة من ناس قريبين منها، ووصفته إنه "تكسير وقتل، التعبير كان واضح إنه مجازي، لكنها كانت بتوصل فكرة إنها مضغوطة ومقهورة من أقرب ناس حواليها، وإن ده مأثر عليها نفسيًا".

ورغم نبرة التعب في كلامها، شيرين وجهت رسالة طمأنة لجمهورها، وقالت إنها قوية وربنا واقف معاها، وإنها شغالة على حاجات جديدة الفترة الجاية: "ربنا مقويني، وأنا عايشة ليكم وباشتغل علشانكم".

مصادر قريبة من شيرين بتقول إن فيه شغل جديد بيتحضّر فعلًا، وإن التسجيل المتداول بيعكس قد إيه الفترة اللي فاتت كانت صعبة عليها، لكنها بتحاول ترجع بشكل منظم وهادي، وتثبت إنها لسه موجودة على الساحة بقوة.