جيهان الشماشرجي فنانة منورة وسط جيلها بمعنى الكلمة، عندها جاذبية خاصة وطريقة لوحدها كده، بتتعرض حاليًا لحملة انتقادات على شكلها مش تمثيلها! وده الغريب، نقدر نقول حملة مدفوعة أو ممنهجة المهم إن في شواهد كتير بتقول إنها مش صدفة!

يعني لو بصينا على طريقة التعليقات المكتوبة لانتقادها هنلاقيها نسخة واحدة، يعني محدش كلف خاطرة وكتب هو شايفها مش حلوة ليه من وجهة نظرة.

"أقسم بالله شايفها عادية خالص ومتستاهلش كل الضجة دي، والبنت بتاعتي أحلى منها بمراحل"، ده تعليق منتشر جدًا على جيهان، والحقيقة إن مفيش ضجة معمولة عليها بالعكس، في فنانات كتير وأصغر منها واخدين ضجة أكبر منها بمراحل!

والأهم،، إن الفنان مش ضروري يبهرنا بشكله، المهم طريقة تمثيله وإحساسه اللي بيقدر يوصلنا بيه الشخصية اللي بيقدمها على الشاشة.. دمتم سالمين.