خلال الفترة الأخيرة، شهد الوسط الفني أزمات صحية تخص عدد من كبار نجوم الفن اللي بنحبهم، تعالوا نعرف حصلهم إيه؟
سوسن بدر عملت عملية بعد كسر في المفصل!
الفنانة القديرة سوسن بدر وقعت في أول يوم تصوير مسلسل جديد، وده سبّب لها كسر في مفصل القدم، واتنقلت على طول للمستشفى علشان تعمل عملية جراحية عاجلة لتثبيت الكسر بشرائح ومسامير.
العملية نجحت الحمد لله، لكن سوسن لسه بتعاني من آلام، وموجودة تحت إشراف الأطباء لحد ما حالتها تستقر، مع توصيات بالراحة وتقليل الحركة قبل ما ترجع لأي نشاط فني.
هاني شاكر بيغني وهو قاعد على كرسي بعد جراحة في ظهره!
الفنان هاني شاكر رجع يقابل جمهوره بعد ما خضع قبل أسابيع لعملية جراحية في العمود الفقري لتثبيت الفقرات، وبعدها بدأ مرحلة التعافي والراحة.
آخر ظهور له كان في حفلة غنائية في أبوظبي، وظهر وهو قاعد على كرسي تنفيذًا لتعليمات الأطباء علشان يتجنب أي ضغط على ضهره، ورغم حالته الصحية، الجمهور تفاعل معاه بشكل كبير.
المكتب الإعلامي لهاني شاكر أكد إن العملية نجحت، وإن حالته الصحية مستقرة ومطمئنة، وإنه ملتزم بالراحة، مع وجود حفلات متخطط لها خلال شهري فبراير وأبريل اللي جايين.
نقل محيي إسماعيل لدار رعاية الفنانين
الفنان المخضرم محيي إسماعيل مرّ بأزمة صحية الفترة اللي فاتت استدعت دخوله المستشفى، بسبب مشاكل صحية مرتبطة بمضاعفات السكر والكلى.
وبعد ما حالته استقرت، قرر الأطباء نقله لدار رعاية كبار الفنانين في مدينة السادس من أكتوبر، علشان يكمل علاجه ويتابع حالته الصحية، وده تحت إشراف ومتابعة نقابة الممثلين.
في النهاية، بنتمنالهم الشفاء العاجل والعمر الطويل.
