اشتعلت المنافسة على لقب الأعلى مشاهدة بين مسلسلات رمضان 2026، بعد ما دخلت الفنانة ياسمين عبد العزيز والمخرج محمد سامي في حالة جدل خفيف على السوشيال ميديا بسبب ترتيب نسب المشاهدة على منصة شاهد؛ تعالوا نشوف حصل إيه في السطور الجاية…

نشرت ياسمين عبد العزيز ستوري على حسابها الرسمي بـ إنستجرام، رتبت فيها مسلسلات رمضان من حيث المشاهدة على منصة "شاهد Mbc"، وقالت إن مسلسلها "وننسى اللي كان" احتل رقم 1 ومسلسل مصطفى غريب "هي كيميا" رقم 2 و"المداح" لـ حمادة هلال رقم 3، أما "الست موناليزا" لـ مي عمر رقم 4.

الستوري استفزت محمد سامي زوج مي عمر، وقرر يرد على ياسمين برسالة قوية جدًا، وقالها: "الله يبارك فيكي يا ياسو، أخيرًا بعد ما عرض موناليزا خلص بيومين، كنتي فين من أول رمضان يا غالية؟ عارف إن نفسك في الموضوع ده من واحد رمضان، بس النصيب بقى. ساعات الواحد يتمنى حاجة يوم واحد ربنا يكرمه بيها يوم 16".

وقالها كمان: "ادعيلي بقى لأني أنا اللي أقنعت مي إن الست موناليزا يبقى 15 حلقة بس، يا إما كان الواحد اتمنى حاجة يوم 1 ربنا يدهاله بعد العيد زي السنة اللي فاتت كده، دايمًا ناجحة ومتوفقة يا حبيبتي، وعقبال السنة الجاية، ودايمًا تمتعي الجمهور اللي بيحبك وأنا أولهم".