بعد طرح بوستر مسرحية "على وضع الطيران"، ناس كتير لاحظت اللوك اللي ظهر بيه الفنان الكوميدي شيكو، واللي كان لابس نفس ستايل الرابر ويجز في واحدة من حفلاته، وقلب الدنيا وقتها بـ الشورت الموف والجاكيت الأخضر. (ممكن تراجعوا اللوك من هنا)

وكشف شيكو تفاصيل شخصيته خلال لقاءه ببرنامج "et بالعربي"، وقال: "أنا واخد اللوك بتاع ويجز بالظبط بس طبعا 8 x، ووضح إنه بيعمل شخصية مطرب وممثل مشهور أوي اسمه "ميمي الصغنن"، شخص مزيف محدش عارف شكله، دايمًا بيلبس نضارات ولما بيقلع النضارة محدش بيعرفه.

أما أحداث المسرحية، فهي بتدور حول رحلة طيران عادية متجهة من القاهرة لـ إسطنبول، الرحلة بتضم ركاب شخصياتهم مختلفة وكل واحد منهم مسافر لسبب غير التاني، لكن بتتغير أحداث الرحلة خالص بعد ظهور خاطف للطائرة.

بيشارك في المسرحية عدد من الفنانين منهم، هشام ماجد، محمد سلام، رحمة أحمد، شيماء سيف، أوتاكا، مصطفى غريب، ونجوم أكتر.

مسرحية "على وضع الطيران" هتعرض بداية من الخميس 25 مايو ومستمرة لـ 29 مايو الجاري في الرياض.