اتعودنا كل سنة نظبط ساعاتنا على برامج المقالب والمسابقات في رمضان، واللي مابتقلش أهمية عن المسلسلات بالظبط. وطبعًا برامج المقالب بتكون في أول القايمة، موجودة من أيام الكاميرا الخفية، ولها مكان خاص في قلوبنا. وبيجي بعدها برامج المسابقات اللي بتسلي الوقت وتحلى بيها اللمة.
إحنا جمعنا لكم أهم البرامج اللي هنشوفها في رمضان السنة دي، تعالوا نعرفها:
رامز مجنون رسمي
طبعًا ماينفعش ييجي رمضان من غير رامز، معروفة. اسمه دايمًا محجوز في صفوف برامج المقالب. وحسب موقع "في الفن"، رامز انتهى من تصوير حلقات برنامجه "رامز مجنون رسمي" في دبي. وده قبل أزمة غلق المطارات وتعليق السفر بسبب انتشار فيروس كورنا. من ضمن ضيوفه: ياسمين صبري، أمينة خليل، ياسمين رئيس، حمو بيكا..
إغلب السقا
البرنامج مأخوذ عن فورمات عالمى لبرنامج المسابقات "beat the star". بتقدم برنامج "إغلب السقا" رزان مغربي. وفكرته بتدور عن منافسات صعبة بين النجم أحمد السقا وعدد كبير من النجوم الضيوف. واللي هيكون من ضمنهم: محمد هنيدي، نيللى كريم، ودرة، فيفي عبده، كريم عبد العزيز، أمير كرارة.
خلي بالك من فيفي
الفنانة فيفي عبده، هتقدم السنة دي برنامج المقالب "خلي بالك من فيفي". وبتشاركها في تقديمه الممثلة المغربية زينب عبيد. وهتستضيف خلاله عدد من نجوم الفن، في مصر والوطن العربي.
محدش فاهم حاجة
الفنان الكوميدي محمد ثروت هيقدم برنامج "محدش فاهم حاجة". بس على عكس البرامج التانية، ثروت مش هيستضيف فنانين، وهينفذ المقالب في الجمهور.
البروفة
نفس فكرة الكاميرا الخفية، بيتم اقناع ممثلين مبتدئين بعمل بروفات، علشان يكونوا جزء من عمل فني جديد. وهنا بتحصل مواقف كوميدية كثيرة في حضور الفنانتين انتصار وبدرية طلبة، واللي بيتظاهروا إنهم جزء من البروفة.
رمضان كريم.
