رحل النهاردة الموسيقار الكبير هاني شنودة، عن عمر يناهز 83 عام، بعد مسيرة طويلة ومشرفة من الإنجازات في عالم الموسيقى والغناء، مش بس كده هاني شنودة كان صانع ومكتشف النجوم وساهم في تغيير وابتكار موسيقى جديدة في مصر، صحيح فقدنا أيقونة موسيقية ما تتعوضش، لكن أعماله هتفضل عايشة جوانا.

يالا نفتكر نجوم اكتشفهم الموسيقار الراحل هاني شنودة.

عمرو دياب.. اكتشف فيه "لمعة النجم" قبل الشهرة

كان هاني شنودة من أوائل الموسيقيين اللي آمنوا بموهبة عمرو دياب في بداياته، ودايمًا كان بيقول إنه بيعرف النجم من "اللمعة اللي في عينيه" قبل حتى صوته، وده اللي شافه في عمرو.

أول أغنية قدمها الهضبة كانت من ألحان هاني شنودة سنة 1983، واسمها "الزمن"، كمان شنودة ساهم في تقديم عمرو دياب  لشركات الإنتاج، قبل ما ينطلق بأول ألبوماته ويبدأ مشواره اللي خلاه واحد من أهم نجوم الغناء العربي، وبعد سنوات، أكد شنودة إنه يعتبر عمرو "واحد من أولاده"، وإنه لا ينتظر منه رد الجميل، لأن نجاحه هو أكبر مكافأة بالنسبة له.

محمد منير.. صاحب الرهان اللي كسبه هاني شنودة

لما قابل هاني شنودة بمحمد منير من خلال الشاعر عبد الرحيم منصور، كان منير لسه بيحاول يثبت نفسه، لكن المنتجين وقتها كانوا مترددين في تقديمه.

شنودة آمن بموهبته وقرر يخوض المغامرة، وقدم معه ألبوم "علموني عنيكي"، ورغم إن التجربة الأولى ما حققتش النجاح المتوقع بسبب ضعف انتشار شرائط الكاسيت وقتها، رجع يتعاون معاه مرة تانية في ألبوم "بنتولد"، اللي كان نقطة التحول الحقيقية في مشوار الكينج. 

هاني شنودة وفرقة المصريين  

أسس شنودة أول فرقة موسيقية في مصر فرقة المصريين سنة 1977 لتكون من أوائل الفرق اللي قدمت لون جديد بيجمع بين الموسيقى الحديثة والروح المصرية، بعيد عن الشكل التقليدي للأغنية وقتها.

قدمت الفرقة مجموعة من الأغاني اللي بقت علامة في ذاكرة الجمهور، زي: "ماشية السنيورة، ماتحسبوش يا بنات، الشوراع حواديت"، وخرجت منها أصوات ومواهب مثل إيمان يونس ومنى عزيز، وبقى المشروع واحد من أهم محطات شنودة الفنية، ودليل على رؤيته في اكتشاف وتقديم مواهب جديدة.