اتعودنا كل سنة في شم النسيم، نخرج نقضي اليوم مع الأهل والأصحاب، في مكان مفتوح أو سفرية. لكن السنة دي احتفالنا هيبقى مختلف شوية، لإننا هنكون في البيت وملتزمين بالحجر الصحي. بس ده لا يعني إننا مانحتفلش ونفرفش، بالعكس.. إحنا هننبسط جوة البيت بأكتر من طريقة. إزاي؟ هنقول لكم:
1- استمتع بتلوين البيض
استمتمع بكل طقوس اليوم زي ما هي. لوّن البيض بألوان مبهجة، ومفيش مانع من أكلة رنجة على الماشي. وماتنساش طبق السلطة والبصل والليمون، واشرب مياه كتير.
2- جمّع العيلة على فيلم أو مسرحية
بدل ما كل واحد مشغول بموبايله لوحده، أو اللي مقضيها نتفليكس مع نفسه.. الكل يتجمع على فيلم بيحبوه أو مسرحية مابيزهقوش منها. أو تقسموا نفسكم فريقين في ماتش بلاي ستيشن، وكله يطلع مهاراته. أكيد القعدة وسط لمة الأسرة لها طعم مختلف.
3- اعمل أكلة مخصوص للمناسبة
طالما مش هتخرج وحاسس إن اليوم ده شبه اللي قبله، ممكن تعمل أكله بتحبها مخصوص في اليوم ده. إيه يعني لو أكلت مكرونة بشاميل مثلًا بدل الرنجة؟ مش هيجرى حاجة. تقدر كمان تدخل على النت وتجرب وصفة جديدة، هتحس بتغيير أكيد.
4- ظبّط قعدة في جنينة البيت أو البلكونة
لو بلكونة بيتك واسعة أو عندك جنينة، حضر الكوتشينة والدومينو والطاولة، وعيش أحلى داي يوز مع أهلك. أكيد بتخرج للبلكونة كتير، لكن الوضع هيكون مختلف وانتوا محضرين القعدة مخصوص، ومجهزين كل وسائل الترفيه. وأهو تبقوا شوفتوا الشمس مع بعض.
5- وثّق اليوم بالصور
زي أي مناسبة، سجل لحظات اليوم ده بالصور والفيديو. ده أول شم نسيم في البيت، فأكيد مختلف. وممكن انت وأصحابك تشاركوا صوركم في البيت مع بعض، الفكرة هتبقى مختلفة ومسلية. وأكيد الضحك هيكون للركب.
كل شم نسيم وانتوا طيبين
