اللي قال زمان "ابن الوز عوام" مكدبش، حقيقي الموهبة بتتورث، وممكن تبقى امتداد لفنان بروح جديدة، وفي الغناء شوفنا مؤخرًا أبناء فنانين ورثوا منهم موهبة الغناء، منهم اللي احترف ومنهم اللي لسه في بداياته، تعالوا نعرفهم.
جانا عمرو دياب
ظهرت على السوشيال ميديا بأغاني إنجلش، ومع الوقت قدمت مع الهضبة أغاني في ألبوماته، لحد ما احترفت والجمهور عرفها أكتر في "خطفوني".
جودي أحمد سعد
غنت في برنامج "معكم منى الشاذلى" وفن مؤخرًا في أخر حفلات أحمد سعد على المسرح، وتعتبر خطوة جديدة بتمهد دخولها عالم الغناء كـ محترفة.
هنا بنت شيرين عبد الوهاب
غنت أغنية والدتها "على بالي" على السوشيال ميديا، وواضح إنها مهتمة بالغناء، لكن لسه مش واضح طريقها.
محمد فضل شاكر
كسر الدنيا بدويتو "كيفك ع فراقي" مع والده، والحقيقة إن صوته وإحساسه خطف قلوبنا، والجمهور مستني يسمعه أكتر.
محمد أحمد عدويه
مع إن ستايله في الغناء مختلف عن والده خالص، لكنه ناجح وله بصمة في عالم الغناء، وأغنياته ليها شهرة كبيرة.
مريم عامر منيب
بعيدة شوية عن الغناء، ولكن أعادت تقديم أغنية والدها "عامل إيه في حياتك" والناس حبت صوتها، وبيطلبوا منها تغني أكتر.
أدهم مدحت صالح
قدم أكتر من أغنية، ومؤخرًا شارك والده غناء دويتو "ناقصك إيه"، وده أول تعاون غنائي بينهم.
أحمد علي الحجار
مش بس بيغني حلو هو كمان بيعزف بيانو حلو، ومن وقت للتأني بيعيد غناء تترات والده وبعض الأغاني القديمة.
