نشرت القناة الرسمية لمهرجان القاهرة السينمائي على يوتيوب، مقطع فيديو لرئيس المهرجان الفنان الكبير حسين فهمي، بيوضح من خلاله شروط جديدة لأزياء الفنانات، اللي من المقرر يحضروا بيها فعاليات المهرجان في دورته الـ 44.

اتكلم "فهمي" عن وجهة نظرة في طريقة تناول الإعلام لفساتين الفنانات في الدورات السابقة، وقال: "المسألة تطورت وبقى ورينى يا حبيبتي الفستان طب لفي كده، اسمه إيه الكوافير؟ مش ده المهرجان".

وأكد إن كل القائمين على المهرجان بما فيهم الفنانين والضيوف، هيكونوا لابسين بطريقة لائقة، يعني "دريس كود" موحد ومتعارف عليه في المهرجانات الدولية، وفي نفس الوقت الناس هتبقى شيك وهيبان إنه مهرجان قيم جدًا. حسب تعبيره.

هتبدأ فعاليات مهرجان القاهرة السينمائي الدولي في الفترة من 13 لحد 22 نوفمبر 2022.