معروف عن القهوة أو "فنجان السعادة" زي ما بنسميها، إنها من أكبر مصادر الفوقان، ومهما كانت طقوسك وأنت بتشربها، هتظبط مزاجك كده كده، لكن الأكيد إن القهوة زيها زي أي حاجة في الدنيا ليها فوائد وأضرار، وكشفت دراسة جديدة عن سلوك سلبي مرتبط بشرب القهوة، يمكن هيزعل الرجالة أكتر من الستات، وبالذات الرجالة المتجوزين، ياترى هو إيه؟

الدراسة بتقولك يا سيدي، إن الأشخاص اللي بيشربوا مشروبات بتحتوي على كافيين قبل ما يعملوا شوبينج، بيصرفوا فلوس أكتر وبيشتروا حاجات يمكن مش محتاجينها أوي.

الكافيين اللي موجود في مشروبات كتير وأكثرهم شعبية القهوة، بيفرز مادة الدوبامين في الدماغ، وبالتالي بيحسسنا بسعادة وطاقة كبيرة، والاتنين دول بيخلونا نشتري بأريحية من غير ما نعمل حساب بعدين.

الدراسة دي اتعملت على ناس اشتروا من السوبر ماركت والمولات واشتروا كمان من مواقع البيع أونلاين، والنتيجة كانت واحدة في الحالتين، وأهمها إن معدلات التحكم في نفسهم وقت الشوبينج، كانت أقل كتير بعد شرب مشروبات الكافيين.