ناس كتير بتعاني من قلة النوم، اللي دايمًا بيصاحبها إحساس بالإرهاق والتعب على مدار اليوم. وده بيحصل لما الواحد ياخد وقت طويل علشان ينام، أو يصحى في نص الليل لفترات طويلة.

وعلشان النوم ينتظم، لازم نتجنب 8 عادات يومية في حياتنا. هي اللي بتأثر سلبيًا عليه من غير ما نحس. تعالوا نعرفها:

1- التعرض لشاشات التليفزيون أو الموبايل قبل النوم

المخ بيحتاج أنشطة مريحة بالليل، علشان يتحضر لنوم كويس. فضروري تقفل التليفزيون وتبعد عن الموبايل 30 دقيقة قبل ما تنام، لأن الضوء الأزرق الخارج من الشاشات دي بيمنع إنتاج هرمون الميلاتونين. الهرمون المسؤول عن دورة النوم. وفي المقابل اقرا كتاب، أو خد شاور دافي قبل ما تنام.

2- عدم النوم في أوقات منتظمة

ساعتك البيولوجية بتتحكم في عدد ساعات نومك، وكمان إمتى بتنام وتصحى. فلو غيرت مواعيد نومك، ولو مرة واحدة، دورة نومك بتتأثر بشكل كبير لفترة طويلة. علشان كده اعرف مواعيد نومك المعتادة، واثبت عليها. ده هيحسن النوم بشكل كبير.

3- الأكل كتير قبل النوم

لو وجبتك الأساسية كانت بعد الساعة 3 العصر، تبقى متأخرة. فتخيل بقى ضرر الأكل الكتير قبل النوم مباشرةً. دراسات كتير ربطت بين الأكل متأخر، وبين عسر الهضم والارتجاع. واللي بالتالي بيأثروا على النوم وكمان الصحة. علشان كده:

- تجنب تمامًا أي أكلات تقيلة قبل النوم بـ 3 ساعات.

- الحلويات والوجبات السريعة يُفضل تكون بالنهار بس.

- اشرب شاي البابونج من غير سكر، لإنه مهدئ طبيعي وبيساعد على النوم.

4- الإفراط في الكافيين

الكافيين بيخدع الجسم إنه مش تعبان، فيفضل في حالة نشاط طول الليل. ده كمان تأثير الكافيين بيستمر في الجسم، لمدة 10 ساعات بعد فنجان الفهوة. وللأسف مش القهوة بس اللي فيها كافيين، ده موجود في الشوكولاته، مشروبات الطاقة، معظم أنواع الشاي، المشروبات الغازية، وحتى الكاكاو. فالأفضل تقلل استهلاكك للكافيين، وحاول تشربه الصبح بس. 

5- الغفوة الصباحية

غفوة الـ 10 دقايق زيادة بتاعت كل يوم الصبح، مش هي اللي هتساعدك تفوق. بالعكس الغفوة بتزود مستويات الكورتيزول (هرمون التوتر). فحاول دايمًا تاخد كفايتك من النوم، بإنك تنام في ميعاد ثابت.

6- الأكل غير الصحي

الأكل غير الصحي بيحرم الجسم من معادن وفيتامينات مهمة جدًا، زي فيتامين A, B1, D - المغنسيوم - الكالسيوم - الزنك. واللي كلها ضرورية للنوم. فضروري تاكل خضراوات وفاكهة كتير، وكمان الرز والحبوب. ابعد تمامًا عن الوجبات السريعة، والأكلات اللي بتحتوي على نسب سكر عالية.

7- عدم التمرين

أغلبنا بيهمل التمرينات الرياضية، رغم أهميتها الكبيرة. الرياضة مهمة للنوم، زي ما هي مهمة بشكل عام لصحة الجسم. حاول تمارس الرياضة لمدة 30 دقيقة يوميًا، حتى لو مجرد المشي. ده هيحسن حالتك النفسية والصحية، ويقلل المدة اللي بتاخدها قبل ما تدخل في النوم.

8- أوضتك مش مترتبة

ترتيب أوضة النوم مهم جدًا للأطفال والكبار. الأوضة اللي فيها حاجات مرمية في كل ركن، بتزود التوتر وبالتالي النوم بيكون أصعب. علشان كده من الأفضل إنك تشيل أي أوراق خاصة بالشغل، أو أي أدوات إلكترونية وغيرها. لإنها بتعمل جو مزعج مايساعدش على النوم.