في مداخلة هاتفية مع برنامج "الحكاية" للإعلامي عمرو أديب، رد الفنان باسم سمرة على تصريحات محمد رمضان. بخصوص فيديو منتشر ليهم على السوشيال ميديا، في أحد الأفراح. وقال سمرة إنه مش هيرد عليه، وبيدعوه لفيلم روائي مدته 10 دقايق. يبان من خلاله موهبة كل واحد منهم في التمثيل.

ولما سأله "أديب" إذا كان رده بيتمثل في مناظرة سينمائية بينهم، قال "سمرة" إنهم مثلوا قبل كده مع بعض في مسلسل "هالة والمستخبي". اللي كان بطولته مع الفنانة ليلى علوي، بمشاركة محمد رمضان. وبعدها انفعل "سمرة" بشدة، وقال إنه كان محتضن رمضان وبيحبه، لكن دلوقتي الشيطان سايقه.

وأكد "سمرة" على دعوة رمضان لفيلم روائي قصير، والحكم فيه يكون للجمهور. لأنه مايقبلش إن حد يظهر على التليفزيون ويشتمه، خاصة لو كان عيل صغير زي رمضان. وقال "انت بتقول انت نمبر وان أنا هوريك".

رد باسم سمرة جه على خلفية تصريحات محمد رمضان، مع الإعلامي وائل الإبراشي في برنامج "التاسعة". لما علّق على الفيديو وقال إن باسم سمرة صديقه وماكنش في وعيه لما دفعه بإيده. ولو كان يقصد فإيده الشمال موجودة.