معروف إن البنات بتهتم جدًا بالتفاصيل، وفي عالم البنات تفاصيل محدش يعرفها غيرهم، أهمها يكون شكلها حلو وتريندي طول الوقت، والفكرة دي بتسيطر علينا، لدرجة إننا ساعات لما بنقف قدام المراية، بنشوف نفسنا عكس الحقيقة اللي كل الناس شايفنها.
ودي فكرة أغنية "تخنتي" لـ مصطفى شوقي ونبيل، واللي بيقدموا خلالها نصايح لكل البنات علشان يقبلوا شكلهم كده زي ماهو، ومن وحي الأغنية دي، هنقدم لكم 5 أفكار علشان تتقبلوا نفسكم زي ما هي:
1- إنتي حلوة زي ما إنتي
أول نصيحة بيقولهالك المطرب مصطفى شوقي، إنك لو حاسة أنك تخنتي ووزنك زايد، لازم تشوفي نفسك حلوة بالشكل اللي وصلتي عليه، يعني ماتزعليش على نفسك، حبيها ودي أول خطوة إنك تحسنيها.
2- بالمكياج حكاية ومن غيره برضه حكاية
أكيد بنقابل حوالينا، بنات طول الوقت حاطة طبقات ميكب كتير على وشها، معتقدة إنها كده في أحسن شكل ليها، والمفاجأة إن أوقات الميكب بيخبي جمالنا الحقيقي، فا ضروري كل بنت تصدق من جواها، أنها حلوة كده كده.
3- ما تبصيش تاني في مراية
وهنا مش المقصود تهملي نفسك وماتبصيش في المراية، لكن تحرصي ميكونش عندك وسواس المراية، وكمان تزودي ثقتك في نفسك، والمراية تتحول بالنسبالك لمجرد أداة بتطلي منها على جمالك.
4- طبيعتك أهم
أوقات كتير جمال الروح بيغلب جمال الملامح، مش بس كده، التصرف بطبيعية بيجذب الناس ليكي وبيخليهم يحبوكي أكتر، فبلاش تتصنعي أو تكوني نسخة من حد.
5- اللي بيحبك هيشوفك أجمل واحدة
ماتتعبيش نفسك وترهقيها، علشان توصلي لقلب حد، اللي بيحبك هيشوفك في عيونه أجمل بنت.
وأخيرًا..
حبنا لنفسنا وتقبلنا لكل عيوبنا أهم حب حقيقي ممكن نستمتع بيه ونصدقه.
5 حاجات بلاش تعملها لو عايز تتعرف على بنت.. علشان هتقفل منك
